Сян по’’ тяхана маня’’ няхаюна нянэй мядм’ Няръяна мар’ хэвхана мярӈаханзь. Тикы Ксения Филипповна Явтысая вэсаконда няюв’. Вэсакода Афанасий Петрович Явтысый яханана теневана ненэцясь, сава илм’ мэ’’мы, илеванда ямбан хойхана манзарась. Тет по’’ тяхана яӈгумась.

Вэсаконда яӈгу’’махад ӈод Ксения Филипповна харта мядуда нидась’ хае’’. Пыда мяканда турта’’ хибяри’’ ӈока’’ ӈэсьты’’. Хибя’’ тенева’’, мядуда’’ Куя’ яха вархана нусьты’’. Ханяӈы мэвахана таняюв’ ты’’ ялям’ мэ’’мась тэворцетыва’’. Хой’ илӈгана илена’’ хибярина ма’’ласьтыд.

Хаювы’’ яляхана Ксения Филипповна Явтысая няюв’ лахана-курӈамась. Хонравась’: ханзер’’ серуда теда миӈа’’, хурка манзаи’’ пэрӈа? Мяд’ манзаям’ пэртя нява’’ тарця вади’’ хэтась: – Мядун’ тамна пэръян’, хибяри’’ пили’’ турцеты’’. Валакада мань’ теда туристическо – культурной центрхана манзарадм’. Тюкохона ӈани мяду’’ пэрӈам’. Хибяри’’ мят’ ӈоб тосьты’’, мят’ турман’ харвана’’ танесеты’’. Валакада теда ихинян’ серуна нись’ тарем миндарха’’. Мань’ харвам’: мядуна’’ тюкохона нянэй мядрев’ ӈэбнандо’. Хойхана илебнана мядуна’’ хурка ӈэсьты, тарця ӈэбнандо’. Мюйхандо’ хусувэй ӈамгэда танябнанда. Мят’ турта’’ теневабто’ нянэй мя’’ хурка’’. Ханярид’ турта’’ хибяри’’ теневабто’ нянэй ненэця’’ хойхана илевы’’ илесь мядудо’ хуркаць, теда хурка. Турта’’ хибяри’’маня’’ культурава маниебнандо’, маня’’вадава намдурпато’. Турта’’ хибяри’’ теневаван’ харва’’: ханзер тюку яхана хибяри’’ илеса’’, ханзер тены’’ похо’’на иле’’.

Корр: Пыдара’’ ся’’ня Куя’ яха вархана нудаць, тамальӈгана ӈацекы’’ няюв ӈокавна манзарадаць, ӈацекы’’ нянда турцеты’’. Ӈацекы’’ е’’эмня ӈарка манзаям’ сертабидаць, няндо’ ненэцие’’ хибяри’’ ил’ нямна вади’’ мэцьтын’. Теда ӈацекы’’ няюв манзарада’’?

– Мань’ теда туристической центрхана манзарадм’. Ӈодьбянда ӈацекы’’ няюв невхы’ тотрев нидм’ манзара. Пыдо’ няюв теда ӈани’’ хибяри’’ манзара’’. Невхэна ӈацекы’’няюв ӈокавна манзарамась. Нянандо’ манзарась савархась, пыдо’ ненэця’’ ила’ нямна ӈока ӈамгэм’ теневаван’ харва’’. Мякана харвась турцеты’’. Сян по’’ тяхана таӈы мальӈгана лагерь’ манзарась. Заполярный районхад’ товы’’ ӈацекы’’ хэвханана илець. Нельмин’ Саляхад товы’’ ӈацекы’’ ӈокаць. Самляӈг’ яӈганя яля’’ ямбан ӈацекы’’ мякана илець. Тарця лагерь’ ӈацекэхэна саць тара’’. Теда ӈацекына хойхана нисьты’’ мэ’’, пыдо’ хойхана нибнандо’ мэ’’ ӈод теневаван’ харвадо’: ханзер иринадо’, хадунадо’ хойхана илеса’’. Теда вадюданна’’ ӈацекына ехэра’’: ханзер’’ мякна илесь’ тара. Тарця лагерькана мэбнандо’ ихиняндо’ савась. Нерде тобнандо’ палаткахана илець, пудана’’ яля’’хана мят’ илелъядаць. Мякна сеӈгсеты’’, мякна ӈаворцеты’’.

Корр: Ксения Филипповна, хор’’ ирий’ тось ӈармбэй хибярина ӈарка ялям’ мэцьтыва’’, тарця яляхана пыдар’ мякнанд’ ӈод нина’’ ма’’лабсетын’. Тюку по’ ханзер’’ ӈэса’’? Маня’’ ӈармбэй нина’’ мят’ турца’’?

– Тарем’ ӈэсьты’’, маня’’ нина’’ ма’’лабсетына мякана. Тюку по’ ӈармбэй хибярина нинаць ма’’лабю’’. Иб’ӈод ма’’лаван’ харвэйнаць. Куя’ яха вархана мям’ таня, ихиняна таняна ма’’лёван’ харваваць. Хубтанё таня тэвась,ядась нин’ хант’, транспорт’ тара. Транспортна’’ яӈгова нид’ ниваць таняюв ӈэдалёр’’. Ты’’ яляхана таняна ма’’люрӈаваць. Таня турма’’ пир’’, тован’ харвабнанда мань’ нян’ лаханада’’. Ӈобкана ма’’лёван’ харвабнанда, таня ӈэдалаӈгуна’’, ӈобкана ныланаӈгуна’’.