Лэрё’’ явэдм’. Харасяда ян’ сюрба пэвэв. Хаёда мякавахана сярнаридо’ сярна’’, яртидо’ ярӈа’’. Ӈавэ’’ пирка’’на мунодо’ суса’’. Пэвдя пихиня си’’ми ни’’ манэс’’. Няхаркав’’ яля’ хараси’’ ядадм’. Тарем’ яданахани яха’ танабцяӈгана мядиком’ ходм’. Мят’ тю’’ нидам’. Мякы мякана ӈопойри хасава. Ӈули’’ некани то’’олаха ӈэвы. Хонра’’ нивав: -Паханзеди’’ тэта некацяеми илиехэва илеевэнанё’’.

Маньзяван мадамзь хавакэн. Пон’ яӈгунась. Иле’’мямда серокута сер’ вэрда’’ нидав’: – Мюсеняхани тет Тай ню’’ си’’ми пяць. Самбляӈг хабтарка тэри ӈабцато’ сюрмбаб’’нани нядани тянёрка’’. Тай мяӈгацяв си’’ми нёдалӈась, хайбтарэйць. Тэ’’муре’’э сэрк’’ тэвамахадани ю’’ тибя’ лэтувна сэр’’ ныклавы. Тикым’ сана’’махад тамна тяхакумна няхар’’ тынзя’ хун’’мана сэр’’ ӈани’ ныклавы. Ӈоб’’ сюрамба ӈани’ санав. Тай мяӈгацяв пумнани тамна ӈэдалы. Тад’ нернямна тадбэй сэр’’ юр’’ тибя’ лэт ӈани’ныклавы. Ендата сюра, итя париде. Пу’ някуд хаця’’ сюрамба тад санавани, техэ яхани, салаба’ варан’ ӈуя ха’’мыв. Тай мяӈгацями сэр’ варахана сюра хаись. Тай сюдбями пыда ихинянда тарем’ мандараха: – Яво’ сёрахана лыд’’ хэдемда. Маньди хаядм’.

Тэтам’ тивтяни нанакони ня’ ян’ сидяӈэ сэр’’ ӈо’ ниня хатокарӈанинзь. Ӈоб’’ хонёвами нинакы ӈа’’, сэр’’ями хасермы’’. Хасенана салаба варан харьвэни’. Сёвна ханта мы вуни таня’’. Сырам’ ӈаворӈани’. Ныхы’’ вуни таня’’. Салаба’ няд, тана’’махадани’ ян’ танэйни’. Тарем’ сырпа’’ни теневана я’’, яхав’’ ӈэвы’’. Похо’’на сёда’’ ханони’ ходм’. Мятами’ сертани’. Хано’’ни мюня, тырабтавы’’ ӈамза’’, халя’’ таняць. Тюку ян’ илело’’мами’ ти.

Маня’’ няхарӈэ таня илева’’. Ӈоб’’ хувэхэна ӈэдалёда то. Ханамда сяра. Мят’ мятю. Паханзеди’’ тэта’ сейда хаця хань’’. Товы хасава манзь ханада: -Вэва им’ мэта мань нидм’ ӈа’’. Явоӈгад’ тэтаӈэ си’’ми пэрцеты’’. Ӈэдалёртахани мядони саю’ хадавыць. Теда ханахана’’ни иледамзь. Ты’ мандалаком’ ходамзь. Явоӈгад’ тэта ӈани’ тарем’ маси’’: -Тыра’ хэвӈэ савади’ ӈэвэди’. Тына’’ пюлаба’’на’’ сава ӈэдараха.

Паханзеди’’ тэта пыда тарем’ маси’’: – Сава ӈэ’’нив’. Няхар’’ ёнре’’э сейхана со’’, тет мяӈгацями немахана хурцы’’. Пыдо’ няхарӈэ тикандо’ хая’’нё’’. Хэбяндо’ нерня мань тарем’ мадм’: -Тай мяӈгацями иле тэвраира’’, хаванда нерня мэ’’манда вадами мань таня’’нив’. Си’’ивахава яля’ сыӈгарёдо’ яӈгу. Нябимдей си’’ив яля’ ӈэ’ соӈгана нини’ ту’’ ним’. Тай мяӈгацямдо’ сябун’ сярвэдо’.Паханзеди’’ тэтам’ няримдо’ ё’’мы’’. Тай’ не ням’, Палкуро’ тэта нем’, Пайхы’ тэта нем’ нянандо’ тэвравыдо’. Танавы тэхэвадо’ луца’ ю’’ ёнар, саляко’’ пан’’ӈа’’, пензяко’’ тарка’’.

Не’ яӈгацями ня’’амба Тай мяӈгацяни няю’ ялъяв’’. Мань тарем’ мадм’: – Си’’ми ладорпабат я’’авлынсянё’’. Мань ладвэми ӈани’ ни тораӈгу’’. Ӈэванда ни’ яӈгаця’’ями ха’’аврав. Ид’ ӈэвэйда ян’ сехэда’’. Та’ хадав. Хар’’на’’ ина’’ сер’’ илелъяна’’. Пайхы’’ тэта не пява’’, и’’ма’’ пэрӈа. Явоӈгад’’ тэта неданда мэнада Палкуро’’ тэта не. Харта яханда хая. Ты’ пелям’ ныкалӈа.

Тетам’ тивтяв Тай’ не ням’ неданда мэда. Ӈарка мядм’ сертава’’. Саля’ ни’, пирця ян’ мярава. Тад’ нерня’ илевари сер’’. Тына’’ пел маӈгабадаха’’ митеръяна’’.

Та’ валакада.