Перевод на ненецкий язык

Ваеравы’’ яляха’’на’’ Саляхардахад товы не Любовь Пуйко маня’’ яханана’’ манзарана’’ мел’’ нина’’ е’’эмня тохолковам’ минресь. «Из зёрен мастерства – дерево ремёсел» проектмана таславы’’ манзая’’.

Любовь Мянголивна Пуйко ӈудида мэта не, ӈока по’’ ямбан’ декоративно-прикладной творчество’ манзаи’’ минрена. Харта сертавы манзаида’ ӈока’’ округханандо’ танеда’’, всероссийской выставкаха’ ядэласетыда, Ямальской районхана, округандо’ еркы маркана илена’’ мел’’ нита’’ е’’эмня мастер-класс’ сертабасеты. Пыда мел’’мана сэдорана неӈэ знакда’ тане «Мастер декоративно-прикладного искусства Ямало-Ненецкого автономного округа». Харта яхананда илена’’ нита’’ сею’ ихина сомбой манзаяха’’ната маймбтембида. Пыда сававна сэдорана, парколана не. Пенахад, ӈодякоход, нойхад, паӈгалмы манзаида савуцетыдо’. Пыда ӈудаханата сертавы’’ манзая’’ маниева сер’’ли’’ ӈэсеты.
Любовь Мянголивна маня’’ округхана’’ нертеймэвна товы ни’’ӈа’’. Тюку’ мэвахана Няръяна маркад’ хаӈадонзь, тарця юн’ намдась тось. Теда яханана’’ манзарана’’ мел’’ ненэцяӈга’ теневанида манэ’’лабтамби.
Тикы нерцюна 2019 похона турмахананда мел’’ ненэцие’’ е’’эмня творческой лабораториям’ Няръяна маркана, Индигахана минресь. Тарем’ манзарава’’ пуд’ Индига’ ӈэсыхына не’’ cэдораванзь ма’’люрцеты’’, ӈэсыхынандо’ клуб’ мастеров декоративно – прикладного творчества нэць.
Теда товахананда Любовь Мянголивна Няръяна маркана илена’’ нида’’ ӈани’’ несэй серт’ тохолабидась. Тюку’ мэвахана ты пенахад, нойхад мадавы’’ мадабиць, тикахад ӈобкана туцякоцям’ сэдабиць.
Тет яля’’ ямбан’ Няръяна маркана илена’’ мел’’ не’’, Краснойхад, Нижней Пёшахад товы’’ сэдорана’’ туцядамдо’ сэдабиць. Тет яля’’ ямбан’ маркана танеда декоративно-прикладной творчество’ мякана не’’ тэтнась пэвсюмбы ӈэсонд парколаць, сэдораць. Хусувэдо’ сертамбада манзаямда, хамадёда туцякомда ёльцеван’ харвадась. Тикахад нито’ сэдвы’’ манзаи’’ ӈатець.
– Маня’’ сэдбавы’’ манзаина’’ сававна ӈадимяць, туцякуна’’ паской, ӈарка вадам’ Любовь Мянголивнан’ хэтамбива’’. Туцям’ сэдась сибиць ни’’ ӈа’’. Сян’ яля’’ ямбан’ тухува’’. Теда маня’’ тарця падком’ сэдась теневава’’. Тарабнанда не нюнд, не нянд мядонзэйӈэ’ сертаӈгува пир’’, – тарця вади’ проект’’мана манзаравы’’ не’’ хэтаць. – Ямалкад товы мел’’ нява’’ манэ’’лабтадась, ханзер’’ туця сэдабада. Ӈамгэхэд’ сэдабада, ханзер’’ таранида паркбада, ӈоб’ ня ханзер’’ ма’’лась. Тикахад тарця сер’’. Тюку яля’ маня’’ сэдорава’’, маня’’ пудана’’ сэдъя’ манзаи’’ хибя’’ нерня’ минреӈгудо’, хибя’’ сэдораӈгу’’. Ненэцие’’ сэдъя’ сер’’ нибнанда яӈгув’, пили’’ танебнанда. Теда вадюдана’’ ӈацекы’’ тохоламбава’’ нядана’’ переӈгу.
Хаювы яляха’’на’’ Любовь Пуйко няби Маргарита Латышева этнокультурной центрхана манзарана нява’’ Ома ӈэсыхына манзараӈаханзь, таняна илена’’ нехэ’ мастер-класс’ минреӈаханзь. Пыди’ сувенир’’ сертабиць, ни’’ ӈодякоход’ паӈгалпась сэдорана’’ ниди’ тохолабихись, тикахад станокхана ӈодякоход ним’ ма’’лась тоходанаць. Омахана илена’’ мел’’ не’’ сян’ яля’’ ямбан’ ӈока ӈани’’ несэй манзаи’’ тохолаць.
Хэтась тара, тарця лаборатория’ НАО’ ЭКЦ декоративно-прикладной творчество’ отдел’ ӈахакуд’ танеда проект’ « «Из зёрен мастерства – дерево ремёсел» манзарава’’. Округханана’’ «Развитие культуры и туризма» государственной программахад пере’’.