Хусувэй ирий харта нюмда таня. Теда маля нюдя пэвдэй ирийхана илева’’. Ханяӈэхэна нянэй ненэця’’ тюку ирий носиндалава ирийӈэ нюмдебидо’. Нюдя пэвдэй ириян’ тэвась выӈгана маля яха’’, токоця’’ саламбахана тондавы’’. Те’ ёльцяӈгана салабада маля наворӈава. Ялуна’’ хэбимдана’’, пий’’ ямбуворӈа’’. Хойхана илена’’ ненэця’’ поӈгарць варёмдо’ мэ’’ӈа’’, саламба ӈылхад’ халякоцям’ нэкалпи’’.

Тюку ирий’ пуданахана носи’’ яӈго’’ мярбаӈгу’’. Нохо’’,тэвасико’’ мале сеня ӈана ӈарханту тареду сэракокоӈэ хэвы’’. Ӈадьбянда пияко’’, тэвасико’’, нохокоця’’ сырана юхурӈа тарету сэракокоӈэ хэва нид. Ялэда’’ мале тецьхамя, пэвсюм няна нум тахӈгана иры яляри пэкна. Итя’’ ӈабтеня яв няна сырако ири – сэр варк ӈоб тарем ваӈготанта мюня мале манаримна нянзыба сырэй неманта хамы.Ӈарка ненэцяи’’ валкана сэр варк ваӈготанта си’’ ӈэрм ня сядобата – тованта сырада иба ӈэӈгу. Сэр ирико хурина хор Иры пуданахна тамна яв салаби нимня ӈадиберпата, няк’’ нюракуць тай варемта мэпнанта – сыра ямбан ӈэрм яля соховахнанта ӈатеда’. Хурина нюдя пэвдя ирыхана ям тонтавы сыра минханта марюкоӈэ хэбнанта – тад тованта таӈгана саре нув’’ сабе юӈгода’’, танда хасуй ӈэӈгу. Нюдя пэвдя иры ӈэвана хаерта тамна ӈарханта пакал’’мадавэй. Пэвсюм ня’анна хаер нум тахаӈгана вули нярмореӈэ ӈадяб – тебтад ня’’амна нумта вомта. Едэй соянана иры мерця яляна сэван ӈадимбата – ирынта ямбан мерця ялэ’’ пэрӈа. Хубт няна нум тахаӈгана ӈобкад перена тир’’ яля еркана мерцянта ӈабтани пулабату’’ – тебтад няна сава яля ӈэӈгу. Пэвсюм няна менюй иры тасихэй’вана ӈадимбата –вэва нуво товам пэрӈа. Пэвсюм няна парикоя тир’’ ӈобкад перебату’’, тад тикад маниенан навэд ӈарамбату’’ – нумта хадумта. Хурина вэва нув ерт лакри нум тахаӈгана еӈглюс тир’’ ӈадимб – нумта ибемта. Ӈадьбата тад ӈадиманта ялям таславан харвана ненэць пэвсюм няна сомбовна тирха’’, хаерт, тад тикад яавна маирта сармикха’’, ты’’ ханзер ӈэваха сырпата тара нив, пыдумня нядна савовна тасламбиду тебтад няна тованта яля амгэ’ толха ӈэвам. Вэва нувм’ пэртя иры ненэсяӈгана ӈод’’ хуркаривна пун. Тикавахад сырэй яляха мале янамбовна тэв’’ нивам нюдя пэвдя Иры еркад. Пиди’’ сё тальны миӈа, пидя’’ ямбуворӈа, ялэ хибиворӈа, яда ӈарханта сырана тонты. Мале иры пуданахана понта ер’й няю пяӈгу нидяв. Тад тикавахад едэй пом ӈатилт нивам ӈарка пэвдя ирыхад.

Хуркари ялэта’’ тецьхаб ӈод выӈгана илена тикан вунид хасерт. Хад ӈэбта ӈэя, ӈэрм ӈэбнанда ненэй ненэця’’ мерцянта ӈабтани тамна ӈэдалёд ним тыто’ сава хадод пюрць. Тюкона манна нё – хад харта хад, мерця харта мерця, сарё харта сарё – ненэй ненэця’’ тамна нерня минт ним. Вэва нумкад таӈылмы юӈгу нив илеванта ямбан невхи ненэцяи’’ вадавна.