Тюку ирийхана округханана илена’’ хибяри’’ тамна ӈопой ӈарка паднанава тензебтемби’’. Мэта’’ ирийна няхар’’юдимдей яляхана паднана Алексей Ильич Пичков сиднтет ю’’ пом’ ядабтаӈгува’’.
Илеванда ямбан Алексей Ильич ӈокавна манзарась, пуданда хаювы’’ книга’’ тянё ни’’ӈа’’. Хусувэй книгам’ сертабавахана паднана нядаӈгодидо’ танесеты. Сямянд’ нядаӈгода’’ – тарця хибяри’ хуний сертабада книга’ е’’эмня падтаӈгу.
Юкад’ вата падтаӈгода’’ Алексей Пичков няюв’ манзаравыць.
Округна толаӈгова’ хардахана манзарана’’ нина’’ Пичков’ книги’’ падтабавы’’ сер’ нямна лаханавам’ хамандавыць. Тарця ма’’лёван’ сидя юкад’ вата хибяри’’ толаӈгова’ харад отдел Севера лохона ма’’люрӈаць. Таняна манзарана’’ нина’’ Алексей Пичков книги’’ манэ’’лабтаць, хусувэй книганда падтаӈгода нямна вади’’ хэтбиць. Ӈокханда сидя яӈганя падтаӈгода’’ нювм’ намдаваць.
А.И.Пичков сямянд’ нюртей падвы’’ манзаита сборник’ Василий Ледков няюв’ сертавэдись’. «Далеко Сэрне моя живёт» сборникди’ 1961 похона ӈадимясь. Падвы’’ манзаити’’ падтаӈгодаӈэ’ Николай Ноговицын таравысь. Тикы’ пуд Алексей Пичков няюв’ ӈарка падтаӈгода’’ манзараць’’, поӈгнандо’ Григорий Рыбоконь «Тропы оленье» книгам’ падтамбавы, Василий Вежливцев «Розовый узор» книга, Рудольф Климов «Сятук», Евгений Зимирев «Едем в тундру на оленях», Сергей Сюхин «Родные напевы»; тамна Надежда Талигина хаби’’ падтаӈгода, пыда манзаида «Куда бегут олени» сборникхана маниейна’’, Надежда Выучейская «Мне вспомнилось детство» сборникан’ ма’’лавы манзаи’’ падтась. Ма’’лёвахана Надежда Алексеевна паднана няюв’ манзаравамда ваде’’ӈась, хэтадась ханзер манзаямда сертабидась. Тикахад’ «Родничок» нюбета садикхад’ товы’’ ӈацекэця паднана няна падвы’’ толабиць. Сейхана саць савархась.
Алексей Ильич Пичков падвы’’ манзая’’ хусувэй хибяри сеян’ мэёвна еримберӈа’’. Пыда падвы’’ манзаида теневына’’, мэнейна’’, толабина’’. Паднана падвы манзаи’’ толабада’’ поӈгана ӈод’ тарця хибярина’’ таня, хуний сяӈгова пыда книгида падтабиць. Падтаӈгода серм’ харвабтана поӈгана Няръяна маркана илена’’ хибярина’’. Светлана Шадрина «Ты едешь на Канин», «Там, где над озёрами туманы» сборник’ падтабись, Надежда Канюкова «Эту песню у ветров подслушал утром» книгам’ падтась, тамна сидя книгам’ падтамбавы Елена Первакова – «Сыновья метелей», «Не гаснут в небе зори».
Ӈокханда А. И. Пичков книги’’ сидя’яӈганя хибяри’’ падтабидонзь. Тарця падтаӈгода’’ няюв сидна’’ толаӈгова’ хардахана манзарана’’ нина’’ торомдаць.
