Округханана Варандэй ӈэсы’ танясь, таняна нянэй ненэця’’ пилибт’ илець. Тыдо’ пэрӈаць, ёрӈаць, ханисэйм’ ня’’амарпиць. Ненэця’’ харто’ яхадандо’ илець. Сидя юкад’ вата по’’ тяхана ӈэсымдо’ таладонзь.

 Таняна илевы’’ ненэцие’’ ӈокаювдо’ ныхыри’ харто’ со’’явы яхадандо’  илевась март’ тэврэйдось. Мятамдо’ миць нина’’ маркана илелъядаць. Ӈэсыхы’ ил’’мана марад’ ил’ харто’ яханандо’ варёмдо’ мэць илевы’’ ненэцяӈгана сеювнандо’ нись’ ӈа’’. Ӈокаюв’ ненэця’’ манзаядо’ хось я’’амаць, тарем’ маендорць ханяӈыдо’ янамбовна харто’ яхандо’ пуня тэвыдаць. Теда Песчанка’ няна’’ нина’’ харто’ илевамдо’ мэ’’ӈа’’. Ӈопой тарця не Анастасия Ермолаевна Засохина.  Харта илевамда тидхалембада не. Я’’авлада не самляӈг’ яӈганя по’’ тяхана  общинам’ нэсь идэяць. Тарем’ округханана «Некуця» семейно-родовой община ӈадимясь. Таӈок по’’ ямбан манзаям’ минресь сибиць нись’ ӈа’’. Хуркари’’ сер’’ Анастасия Ермолаевна илӈгана ӈадимберӈаць. Тарем’ ӈэбнанда ӈод’ некоця серуда нерняри’’ минрейда. Выдаравада яӈгу. Пыда’ пэдова не. Харта мята’’ тер’’ манзаяси’ нибнандо’ иле, Анастасия Ермолаевна харта со’’явы яхананда общинам’ сертась. Таняна илесь, пыдо’ халям’ ня’’амарпи’’, ханасэй хомби’’, та’ мальӈгана ӈодям’, мараӈгам’ ма’’ламби’’. Ӈамгэковам’ мирдата’’, тикахад’ иле’’. Харта илеванда нямна тарця вади’’ хэтби: - Ӈарка яханана илевава’’ ӈоб нерняри’’ пэрӈава’’. Ханзер’’ небянана, нисянана илець тарем’ маня’’ илева’’. Ханева’’, ёрӈава’’, ёльцяӈгананда ӈоди’’ ма’’лабива’’. Песчанка вархана мэва’’, Роман’ яха мюня нува’’. Тикада вэва,  илесь мя’’ма яӈгу. Тедари’’ балокхана илева’’. Вэвакоця ӈэбнанда’ ӈод, илева’’ пир’’. Серуна тасламбина’’. «Лукойл Коми»  ервота харад’ тю’’у масьтембава е’’эмня ( фундамент ) сертава’’ серкана сидна’’ нядаван’ харва’’. Тикахад’ брус’’, хирпич’’, ӈани’’ таранам’ тэвраӈгува’’. Ноябрь’ ирийхана ся’’ня сывы’ сехэрэда ӈадимда’’ таминда хадандяр’’ таня’’ тэвраӈгудо’. Тикахана таминда хардакова масьтемба’’ пяӈгува’’. Тикахад’ отчет ӈэвтаха’ митам’. Община нерм’ пэртяӈэ’ тикахад’ отчет ня’’абаӈгудм’: хурка манзаи’’ сертаваць, ханя тэвравы’’ ӈавори’’ хая’’.

Тедахова’’ илесь балоккоцява’’ нюдяко ӈэ’’нив. Сывы’ няна вэсакон’ ня сидябёриӈэ’ иленись. Еся’’ печьда’ таня’’, сенядамда сертаваць. Тяхакуна нэсь’’, сырахана тухуӈгась. Тедахова та’ мальӈгана хибярина ӈокамда’’. Ӈацекы’’ тутата’’. Та’ незеларка ӈэ’’ нив. Мядеком’ мярван’ харвам’. Невхэна небя’ хасав’ ханзер’’ мядекоцям’ мярсеты. Тарем’ ӈод маня’’ сертаӈгува’’. Пилю’’ ирий’ ӈэсонд’ иба нив’ ӈэӈгу’’. Тикахад’ товы’’ хибярина ханта’’, манзарась’ ёльцяндо’ тэвась.

Тарем’ янамбовна Анастасия Ермолаевна Засохина харта илевамда минреда. Самляӈг’ яӈганя по’’ тяхана общинам’ нэсь. По’’ ваера’’. Таӈок по’’ ямбан хуркари’’ сер’’ таневакы. Пыда вадавнанда: - « Тюкохона илевана’’ ямбан ӈарка икана тарана’’ ӈаворина’’ ху’’лэядаць, тикахад’ параваць. Тарем’ ӈод ӈоб’ нерня пэрӈава’’. »

Ненсянда ӈод’ тарця, Анастасия Ермолаевна ныхыта’’ не’, тоенана серт’ нись’ выдараӈга’’ янамбовна нерняри’’ миӈа. Харта со’’явы яхананда илеван’ харванар’ харта ямда илелътембась иле. Хусувэй серуда сававна миӈая.