Сидя ёнар’’ няхарамдэй’ яӈганя по’ носиндалава ириян’ тэвына’’. Ваеравы’’ ныланава’’ яля’’хана округна еркы маркана сян’ ихиня сомбой сер’’ ваераць. Маркана илена’’, мядоманзь’ товы’’ хибяри’’ тарця серу’’ маниейдось.

Сямянд’ нюрте Няръяна маркана олимпийской’ тум’ ядабтаваць. Тум’ минревы’’ хибярина самляӈг’ юд’ мянаць.

Тамна ихиня саць сомбой сер’ тарця. Маня’’ округханана харто’ паӈгудо’, харто’ со’’явы ямдо’, сяӈгова сусандавы’’ ӈэсыкоцидо’ тенена’’ хибяри’’ землячество’ сертамби’’. Ӈопой яхад’ перена’’ ӈобт’ ма’’люрць, хари’’ ямдо’ сахарамбась нерня илевамдо’ минредо’. Тарця землячество’’ толырта маля сидя ю’’ ӈопой. Округханана клуб землячеств’’ таня. Тарця клуб’ тюку по’ ю’’ поданда’ хая. Ю’’ помдо’ мэ’’манзь хуркари’’ тенз’ мэта’’ хибяри’’ ӈобкана культурно-деловой центр’ мякана носиндалава ирий’ тетимдей толыркана ма’’лэйдаць. Ӈарка ялямдо’ ӈобкана мэ’’ӈадонзь, ӈобкана нина’’ ныланаць. Ихид’ миндя’’ вади’’ землячество’ манзаи’’ пэртя’’ округна администрация, тикахад’ Заполярный район’, Няръяна маркы Совет’ манзаранахат’ намдаць. Хибяри’’, хуний землячество’ манзаи’’ тю’’увку’ пэрӈа’’ ервхат’ мядонзэй, грамоты’’, благодарность’’ ня’’амаць, сава вади’’ намдаць. Хусувэй землячеcтво’ пыдамда манэ’’лабтамбись, нито’ е’’эмня мядонзэйм’ хамандавыць. Сямянд’ нерде округханана Андег ӈэсыхы’ землячество’ ӈадимясь, тарця серм’ пявы Ульяна Апполоновна Истомина. Нерняна товнда похона маля сидя ю’’ самляӈг подандо’ ханта. Таӈок по’’ ямбан сертавы’’ манзаидо’ маля ӈока. Тикахад’ маля ӈока по’’ ямбан Никитцы, Носовая, Просундуй, Куя, Вижас ӈэсыкоцяхана со’’явы’’, вадювы’’ хибяри’’ ма’’люрӈа’’. Пыдо’ ӈэсыдо’ маля яӈгу’’, тарем’ ӈод хибярито’ ихиня иле’’. Харто’ яндо, ӈэсындо луца’’ вадавна хэтась – память хибяри’’ илелтемби’’.

Землячество’ ма’’лёвахана тюку’ мэвахана Нельмин’ Саля тер’’ нина’’ таняць. Саляхана соявы’’, вадювы’’, манзаравы’’ хибярина ӈэсындо’ историям’ теневадо’, тенедо’. Харто’ ӈэсындо’ вадюданван’ ӈока ныхымдо’ масьтевы’’ хибяри таня товыць. Поӈгнандо’ теневана’’ нина’’ Ф.С. Кауц, А.А. Помылева, Л.А. Булыгина, Л.В. Лаптандер.

Ёнар’’ хасуюёнар’’ сидя ю’’ си’’ивумдей похона округна картахана Ледков’ нюбета ӈэсыкоця ӈадимясь. «Няръяна ты» колхоз’ базаӈэ’ толысь. Нюдя яхана тыдо’ пэртя’’ ненэця’’ таняюв’ тэворӈаць. Ханяӈы’ ненэця’’ мято’ тер’’ тикы ӈэсыкоцяхана илець, манзараць, нюдо’ вадамбиць. Ӈока ты’’пэртя’’ хибяри’’ таняхад’ сайнорман’ хаяць, ханяӈыдо’ пуня ниць’ ту’’. Тикы яхад’, тикы ӈэсыхыд’ паӈгудо’ перена хибяри’’ по’ тяхана землячеством’ сертаць. Ӈарка имня’ ӈэсындо’ ӈэвы ян’ тэворӈаць, памятникм’ ӈамдтаць. Землячество «Деревня Ледково» ӈадимясь, ӈарка манзаям’ тарця серт’ Иван Егорович Ледков масьтесь. Ваеравы ма’’лёвахана Ледков’ ӈэсыкоцяхана вадюданвы’’ хибяри’’ таняць. Тикы Елизавета Филипповна Хатанзейская, Анастасия Федоровна Михайловна, Клавдия Егоровна Валей. Пыдо’ нисянадо’ Ледковхад’ сайнормась ӈэдалэйдаць, ӈэвдо’ ямдо’ сахарамбаван’ масьтець. Иринато’, хадунато’, нисянато’, небянато’ мюсермы’’ ям’ нидо’ юрбю’’.

Ил’ сидна’’ тарем’ тохоламбинё’’. Валакада паӈгуда тенена, невхы илм’ теневана; ирината, нисяната ватовна илена хибяри илевада саваркавна нерня минда ӈэдарха. Хари’’ ил’ ватом’ теневась нерня илесь’ таранарха.

Хусувэй землячество’’ клубхана мэна’’ хибяри’’ тарцям’ тенесь илевамдо’, манзаравидо’ нерня минрейдо’. Хусувэй тены’’ похо’’на сертамбада манзаидо’ нюхуто’, нюто’ нюху хаеӈгудо’. Пыдо’ хусувэй таранам’ таминдя’ нерня минреӈгудо’.

Тарця ихиня сомбой ныланавам’ округна землячество’’ е’’эмня этнокультурный центрхана манзарана’’ нина’’ хамандаць. Няндо’ сямянд’ сава вада’’!