Ты’’ саполана ирийна сиднтетимдей яляхана хэбидя ялям’ мэ’’ӈаваць. Тикы не’’ яля’. Яханана маркана ӈэя, ӈэсыхына ӈэя ӈока сава вадам’ намдувнда не’’ иле’’. Хусувэдо’ харта иламда мэ’’ӈа’’, хусувэдо’ харта манзаянанда манзара, хусувэдо’ харта мята ибам’ лэтби. Не нямна вадина пилибт’ танябнандо’ тара. Нехэд’ хусувэй сава сер’ миӈа, нехэд’ ил’ ӈадиберӈа. Не – небя, хада, нядабако, не ня, не ню.

Тюку яля’ вадин’ Нельмин’ Саляхана соявы сидя нехэ’ нямна ӈэӈгу’’. Пыди’ самляӈг юкад’ вата’’ по’’ тяхана Нюдя яхана мюсерта’’ ненэцие’’ мякана соявэхэнзь. Ӈопой вымна мюсерць вадюданавэхэнзь, тикахад’ ӈобкана ӈопой школахана тоходанавэхэнзь, тикахад’ ӈопой март’ тамна нерня тоходанвась ӈэдалавэхэнзь. Саля’хард маркана медицинский училищехэна тет по’’ ямбан тоходанавэхэнзь’. Лекарь’ манзаян’ тохось, манзарась’ пявэдись. Няхар’’ юкад вата по’’ ямбан ивнянди’ ӈэда манзаянанди’ тенад’ манзараӈаха’. Тикы сидя нехэ’ – Анна Николаевна Талеева нябиюм’ Александра Михайловна Ледкова.

Анна Николаевна маня’’ округханана маля ӈока по’’ ямбан Нельмин’ Саляхана илена’’ ненэцие’’ савумдамби. Тикы ӈэсыхы’ лекарь’ мякана фельдшерӈэ’ тара. Манзаямда мэнена, теневана нява харвась’ манзара. Хусувэй самляӈг по’’ ваерась тоходанвась ӈэдалёрцеты, ханяхад ӈока несэй ӈамгэм’ минрена манзаянда е’’эмня тэврасьты. Манзараванда ямбан ӈока хибярим’ хабцяӈгад’ нэкалӈась. Хуркари’’ нумӈгана хаӈгулавы хибяри мят’ ядсеты.

Нябиюм’ не Александра Михайловна Ледкова. Тикы нява медучилищем’ ёльцесь манзаравась Саля’хардахана хаювысь. Маля няхар’’ юкад’ вата по’’ ямбан хэвхы округханана манзара. Пыда – акушерка, таӈок по’’ ямбан не’’ няюв’ манзара. Сяӈок соявы’’ ӈацекым’ ня’’амась, теда толава’ серта яӈгу. Пыда ня’’амвы ӈацекыда ханярина иле’’, нюртей ӈацекы’’ маля харто’ небя’’. Александра Михайловна манзаямда мэнена не, хусувэй серт’ ив’ сырта. Хэвхананда манзарана’’ нида’’ нямдо’ сава вадарина ваде’’цетыдо’. Хусувэй нехэд’ ӈарка вади’’ намдурцеты.