Ваеравы по’ носиндала ирий’ пудана яля’’ мальӈгана хэвхы округхана илена’’ нина’’ ӈарка серм’ мэ’’мась ма’’лыць. «Ямал потомкам’» нюбета ассоциацияндо’ ӈарка ялям’ мэ’’ӈаць. Сидя ю’’ самляӈг помда’’ядтаць.

Таӈок по’’ ямбан тарця организация’ яханандо’ манзара’’, ӈэрм’ тенз’ ненэциеда хуркари’’ серкана нядабида.

Ассоциацияндо’ ӈарка ялян’ хамяковаханандо’ хуркари’’ сер’’ яханандо’ ваераць. Ӈарка ялямдо’ мэ’’мандо’ мальӈгана ассоциацияндо’ нерм’ пэртя’’ яндахат’ товы’’ няхато’ мядонзэйм’ хамадавыць. Тарця мядонзэйм’ поӈгана Марина Яр фотоальбом’ таневысь. «Человек тундры глазами ненецкой женщины»- таремъюв’ луца’’ вадавна нюмдевы.

Марина Тэтакучевна Яр Гыданский выӈгана соявы, теда ӈод’ харта мяканда пилибт’ тэворцеты. Таняна мюсерта’’ ненэцие’’ няюв ӈока лаханорцеты’’, тикы вадидо’ «Няръяна ӈэрм’» газетахана падбасетыда. Хойхад’ тэвравы’’ сидяӈгада ӈока’’ ӈэсьты’’. Ханзер’’ нянэй ненэця’’ хойхана илевамдо’ минредо’, хурка’’ манзаи’’ пэрӈа’’, тыдо’ хурка’’. Тикахад’ вындер’ хибяри’’ нюкцидо’ ханзер’’ вадамбидо’, ханзер’’ ӈацекы’’ нюдякодандо’ нисянадо’, небянадо’ нядамби’’. Мал’’ тикым’ сидяӈган’ масьтесь манэ’’лабтамбида.

Нянэй ненэця’’ илевадо’ тэхэт’ пере. Хой’ ил’ нянандо’ сямянд’ сава. Ӈодь’ мюсерць яр’ таняя, тыд’ сенз’ ӈэя, мят’ ту’ лэйная. Не ханзер’’ хой’ илм’ сэвхананда маниеда, тикым’ Марина Яр сертавы альбомхананда манэ’’лабтада. Тарця’ манзаям’ хэвхы округхана манзарана паднана нява’’ ассоциациянда манзаям’ пэртя’’ нита’’ няюв’ сидяӈгахат’ альбом’ ма’’лавыць. Тарця манзаямдо’ ассоциацияндо’ со’’яма ялян’ хамададось. Пудана ма’’лёвандо’ мальӈгана мядонзэйӈэ’ яндахат’ товы’’ хибяри’’ ӈод ня’’амадось. Мань’ ӈод теда тарця альбомми’ таня, тарӈада’’, манэ’’лабтаӈгув’.