Округна школахана тоходанна’’ ӈацекына нылана’’, Таӈы няхар’’ ирий’ ямбан нерня тоходанва е’’эмня ныхыдамдо’ ма’’лабгу’’. Тюку по’ школамдо’ ёльцевы’’ ӈацекы’’ ӈод экзамендо’ пуняна’ хаи’’, выпускнойдо’ ваера’’.

Ханяӈыдо’ маля студент’’, вэба ириян’ тэвась ӈани’ ян’ тоходанвась’ ханта. Хибяхова’’ университетхана, институтхана тохолковамдо’ минреӈгудо’; хибяхова’’ Няръяна маркана танеда’’ учебной заведенияхана тоходангу’’. Тюку по’ школамдо’ ёльцевы’’ ӈацекына сян’’ по’’ ваерась маля специалистӈэ’ со’’явы яхандо’ тута’’, харто’ яханандо’ манзарась’ пяӈгудо’. Ӈэрёй’ тось школан’ товнда ӈацекына яханана тянё ни’’ӈа’’, пыдо’ маркана, округна хусувэй ӈэсыхына иле’’, тоходана’’. Тарця ӈацекына маля ирий’ ямбан нылана’’. Ханяӈы ӈацекына ( нянэй ненэця’’ ӈацекэця ) небянато’, нисянато’ хэвхана хойхана ныланавамдо’ мэ’’ӈадо’, хой’ илм’ торомдаби’’, ӈарка нидо’ нядамби’’. Маня’’ ӈацекэнана’’ тикы сава ныланава’’. Ханяӈы ӈацекы’’ небянато’, нисянато’ няюв ныланавамдо’ иба’ яхана мэ’’ӈадо. Тюку по’соцпутевкавна ныланавндина тянё ни’’ӈа’’.

Тюку по’ ӈацекына ныланава сер’ сававна таславы’’. Та’ ямбан нерня тоходанва е’’эмня ныхыдамдо’ ма’’лаӈгу’’.