Тюку яля’ Нейко Янгасова книгахад’ мэвы лаханако «Писяко’ вомде’’ма» тамна ӈопой пелямда толара’’. Лаханако’ пуданада тамна ни’’ӈа’’. Ӈани’’ пелямда нерняна таневнда яляхана намдгура’’.
Писяко’ саю’’ тодо’ яха’’ манрамби’’. Нядэна хасава неманда паӈом’ мэ’’ӈа. Писяко, пияко мяд’ мюмня и’’насавэй санлыйха’, хонёда хасавам’ ӈэванда таркад ӈопоё’’ сякалцетыди’. Нядэна хасава ӈамда санэй’’, пэвдя мякана тум’ посахалӈа. Нельне’’мя’’ хаӈгмандо’ сер’’ хасава’ сэв’ таре парада’’. Тикахад лэрё макоданда син’ тарада. Макода сихиня подер’’ хацяда есай’’. Пэвдя мякана синдак’ помна пин’ пяда. Парэ’ пэянда латан’ матидеда. Ва’’аванда ни’ сюдарць ӈамды’’. Пибида серыба пя. Ӈэда нацдэй’’ ӈэта’’ ядо’. Пивасипой нё’’ сивня пин’ пяда. Нёхолцавэй пэхэнабцяӈгад ӈэда насада’’ лясё ха’’амы’’. Ти’’ нид ютнабця’ пэ лэмбаранда ни’ мантэсь, нядэна хасава хась нарцада. Писякор ӈэванда сери ялъй’’. Тарем’ миндяханда хой харуво’’ман тэвавы’’! Хасрё’’ тиркана ӈоб’’ илебця’ хорам’ ядабта. Писякор илебцянд’ ма: – Хоре’’ей, лынзекохони’, мань сэвани такалтадм’, пыдар лыӈгарад’’!
Хоре’’эр тикы яхад ныхы’ тяха’ нявата тарада, сана’’мада яхана само’’лад’’ тамна писяком’ хаця’’ хада’’. Писякор нылэрида ян’, няхатата пирця лахаця’ ни’ танахая тёрей’’: – Хореков, ламбэйт’ мал’’ ӈади’’.
Пон’ нись мы’’ Хоре’’эр тюковна туроць ӈадимя. Писякор ма: -Теда’ мань ӈани’ лыӈгараӈгув’’, пыдар сэвад такал’’. Хоре’’э сэвада хаемла, писяко нув’ лахаця’ тяха’ сакада. Хоре’’эр хубтыхы ялэмтакад пэвсюмя’ няӈы ялэмдад’ ёльцянд’ туроць писяком’ пюда. Тамна наӈэда яля’ ямбан’ ӈобкарт мынм’ мэвадавэй нумда пэвсюмя’ ӈэсонд’ пюрӈада. Хоре’’эр ӈамды’’. Хасрё’ тэлан’ ха’’махая ӈамдэдонзь теба. Хоре’’эр намлавы’’, нердена’’ мунода’’ та’’вавдавэй нихимбида. Писякор Хоре’’энда ӈаворта ӈамдэдо’ тахамана лакри’ пакалъй’’. Хоре’’э тикы лоӈг ӈамдэдм’ та’’вахалъць пубтада. Писякор хоре’’энда сё’ сивна вырнарида хая.Ӈамгэ ёльцяӈгана Хоре’’э’ идю пароць пярдейда, хоре’’э’ еймана пухуптэй’’. Тад ӈадиво’’махаданда хоре’’э ӈаха’’на ханяна сэвада тыравы’’. Писякор хоре’’энда хабидяр’ ни’ танэй’’, тикахад тёры’’ӈа: – Я’ ӈарка’’ тода’’, мэдамда хададм’ ханесэва’’ яхада’’.
