Округхана школахана тоходанна’’ ӈацекы’’ ненэця’ вадам’ тохолабидо’. Тохолкодина’’ ӈод яханана таня’’, хуний нянэй ненэцие’’ вадан’ ӈацекы’’ тохоламби’’. Ӈокаюв’ тарця тохолкодина’’ маля ӈахакуд’ манзарана’’.

Харто’ вадамдо’ мэта’’, манзаямдо’ сававна теневана’’. Пыдо’ ӈацекына’’ няюв’ ив’ ер манзара’’. Тюку по’ вэба ирий нюртей яляхана ӈацекына таӈы’ ирий’’ ямбан ныланавамдо’ мэць ӈани’’ партито’ тя ӈамдгуд. Тоходанась пяӈгудо’. Округна няхар’’ яӈганя школахана товнда тоходанва’ поход’ ненэця’ вадам’ предметӈэ’ тохолабгудо’.

Хаювы тоходанва’ похона ненэця’ вадам мат’’ юр’’ мат’’ яӈганя ӈацекы’’ тохолабидось. Индига, Хорей Вер, Андег, Бугрино, Нельмин Нос, Каратайка, Усть Кара ӈэсына’’; маркана школа-интернатхана, санаторной школахана, тамна Выучейской ӈэсыхы’ садикхана вадам’ минрена’’ манзара’’. Красной, Ома, Несь – тарця ӈарка’’ ӈэсыхына факультативхана вадамдо’ намдурӈадось.

Ненэця’ вадам школахана тохоламбава’’ серкана ӈарка манзаям’ центр’ образования мякана манзарана’’ нина’’ сертамби’’. Маня’’ вадава нерня пэртява, методистӈэ’ таранава Людмила Яковлевна Талеева. Пыда хамандавы методической рекомендациида’’ манзара’’. Ненэцие’’ вадам’ пэртя’’ тохолкодина’’ няюв Людмила Яковлевна манзара. Вадам’ минрена’’ тохолкодина’’ тенева’’.

Хари’’ вадам’ тохоламбава ӈарка сер’. Тарця серкана небя’’, нися’’ ӈод пуняна мэбнандо’ ни’’ тара’’. Вадам’ пэртя тохолкодина’’ нядабабнандо’. Хусувэй ненэця’ ӈацекы’’ харвась харта вадамда тохолабнанда. Ӈобкана манзарабна’’, вадава пилибт’ танеӈгу, вадава нерня илеӈгу. Тарця сер’ нямна тохолкодина ӈод’ харто’ вадамдо’ хэтая’’.