Ханяӈы’’ округханана ӈока по’’ ямбан илевы’’, манзаравы’’ хибяри’’ манзаидо’ ёльцесь, пенсиян’ тарпась илевась ӈани’ ян’ ӈэдаласьтыд’. Тарця хибярина янда’’хана иле’’.

Ӈани’ ян’ илевась ӈэдалась, идо’ пилибт’ ненэцие’’ яндо’ нямна ядэрцеты’’. Маня’’ яхадана тарпвы’’ хибяри’’ едэй илесь’ яханандо’ землячество’ сертаби’’, ӈопой я’ тер’’ хибяри’’ таняна ма’’люрцеты’’. Тарця землячество’ маля сидя ю’’ по’’ ямбан’ Архангельск маркана таня – «Тосавэй», тикахад’ маля ӈахакуд’ «Нятва» Санкт-Петербургхана илена’’ нина’’ ӈобт’ ма’’лаби, теда Москва маркана ӈод’ округхадана товы’’ хибяри’’ землячеством’ ма’’лаць’’. Округна хибяри’’ нерм’ пэртядандо’ Вячеслав Алексеевич Выучейской тэравыць. Тикы ненэцям’ округханана теневадо’. Канин’ выӈгана соявы, теда Москвахана иле. Ӈарка маркана илебнанда ӈод, Вячеслав Алексеевич, ӈобӈгэв’ округханда’ турцеты’’, харта со’’яма ямда ӈод ванида юрбю. Пуданамэвна Канин’ вынд’ тюку по’ ты’ ялян’ турӈась.

Теда хусувэй Москва маркана илена’’, тоходанна’’ хибяри’’ теневая – тарця землячество’ ӈарка маркана таня. Нюртей ма’’лёвадо’ ӈэрёй’ тось ваераӈгу.