Маня’’ яханана ты’ ялям’ ёнар’’ хасуюёнар’’ няхар’’ ю’’ нябимдей поход’ мэ’’ӈадо’. Тамальӈгы’’ похот’ вындер’ хибяри’’ ӈарка ялямдо’ мэ’’манзь’ ма’’люрӈа’’. Тюку по’ хусувэй выӈгана мюсерта’’ ненэциена ты’ ялямдо’ сиднтет ю’’ няхарамдэй мададось.

Канинхана мюсерта’’ ненэця’’ тюку по’ ӈарка ялямдо’ мэ’’манзь’ пилю’’ ирий’ нюртей яляхана ма’’люрӈаць. Надтей яха’ хэвхана маркад’ товы’’ тиртя ӈаном’ ненэця’’ ядтабиць. Хойхана илена’’ нина’’ мядондидо’ ядтабиць, тикы’ хавна тамна ӈока’’ тарана’’ ӈавори’’ хоян’ тэвраць.

Канинхана мюсерта’’ ненэця’’ ӈахэт’ маля палаткахана иле’’, таняна мяд’ манзаям’ пэртя некоця’’ мядондидо’ ӈатевыць. Ядембада сяйдо’ хамандёвысь, евэй пиревы, ӈамзам, халям хамадавы’’. Нерде маркад’ товы’’ хибяридо’ сяйлабтаць. Тикахад’ маркад’ товы’’ хибяри’’ харто’ манзаидо’ пяць. Тюкумэвахана хибярина’’ «Белый ягель» кином’ манэ’’ӈаць, хуний Я’мал няна’’ илена ненэця илм’ манэ’’лабтаби. Тарця мядонзэй маркад’ тэвравыць.

Ты’ яля – сямянд’ ӈатена’’ ялядо’. Тамальӈгана ненэця’’ ӈобкана ма’’лась танеда серудо’ таслабсеты’’, ты’ пэрма сер’ ханзер’’ мимам’ намдсеты’’, маркад’ тэвравы’’ юн’’ ӈод’ ӈатесеты’’. Тюку ялян’ хэтась СХПК «Ненецкая община «Канинхана» нянэювна мюсерта’’ хибяри’’ иле’’. Хасую’’ ӈэсыхына ненэця’’, не’’ манзара’’. Мат’’ юкад’ вата тыбэртядо’. Мал’’ пыдо’ мяд’ терсавэй хойхана мюсерӈа’’. Нюдо’ хойхана вадаби’’. Невхы по’’ нямна ӈока ни’’ӈа’’, тарем’ ӈод ӈани’ выӈгана мюсерта’’ ненэця’’ ӈэлмана сава. Канин’ выӈгана мат’’ яӈганя ёнаркад вата ты’’ хадырӈа’’. Ненэця’’ ямдо’ сахарамбась, тыдо’ лэтбась яханандо’ иле’’. Тикада тамна саць сава, тыбэртя’’ нюдо’ хойхана вадюдана’’, хой’ илм’ нюдякодандо’ торомдаби’’. Тарем’ илехая’, хой’ тер’’ ненэця’’ таӈга’’, пыдо’ тенева’’ – нюдо’ вадёсь, тохолковам’ ёльцесь хоян’ тэвӈгуд’. Тыдо’ маниена’’ танеӈгу’’, мядм’ манзаям’ пэртя ӈод’ хойхана манзараӈгу’’.

Канин’ тыбэртя’’, мяд’ манзаям’ минрена’’ не’’ варёмдо’ мэць мюсерӈа’’. Илӈганандо’ тоенана сер’’ тамна ӈока’’. Тикан’ нись’ сыр’’, пыдо’ харто’ илевамдо’ нерняри минредо’, тыдо’ лэтби’’, хусувэй серкандо’ ив’ ер сырӈа’’. Ӈарка яля’ ед’ ненэця’’, не’’ тэхэ’’на ӈэдалёрмахана пирдырӈаць. Сямянд’ нерденидо’ нюмдець. Хасава’’ поӈгана нюртейӈэ’ товы Павел Шубин, не’’ поӈгана нердевы Тамара Чупрова. Ӈацекы’’ ӈод ты’ яля мальӈгана юрвы’’ ниць’ ӈа’’. Пыдо’ е’’эмняндо’ ихиня сомбой программам’ Несьхад’ товы’’ культурана манзарана’’ хибяри’’ тэвраць. Ӈацекы’’ ӈарка хибяридрев’ сянакуць: санарӈаць, сюрберӈаць, тынзям’ моепиць. Хасава’’ ӈод поӈгнандо’ пирдырӈаць, не’’ сюрберӈаць. Товы’’ лекарь’ ӈацекы’’ манэ’’сарӈась.