Хэвхы округхана ненэця’’ вадавна ӈадимберта «Няръяна ӈэрм» нюбета газетахана маля ӈахакуд’ Няю Вэнго’ манзара. Ненэцие’’ вадавна падабада серута нямна тикы ненэць’ ӈока хари’’ явнанда ӈэдалёрцеты’’. Ӈэрм’ ненэцие’’ ила, манзарава нямна паднасеты. Тикахад’ янда’’хана илена’’ няхататта хуркари’’ сё’’, хынс’’ падбасеты. «Няхар’’ Ябтоӈэ’ папа» ярабц тарем’ ховэда. Тюку яля’ ярабц нюртей пелям’ толара’’. Харвабнанда хибяховара’’ сёӈэ’ ханаӈгуда.

Няхар’’ Ябтоӈэми’, няхар’’ неками’. Няхар’’ некани’ тэхэвадо’ тэдо’ няхар’’ тавнандо’ няхар’’ ёнре’’э. Ярабцам’ хо’’махад няхаркав’ по’ таня илева’’. Хадона’’ малхана Нядоӈги’ ӈоб’’ ню ӈани’ таня. Нядоӈги’ ӈоб’’ ню’ тэхэвада тэда ӈопой ёнарта. Нядоӈги вэсако нисяда, небяда таняӈаха’. Няхар’’ по’ ёльцяӈгана Нядоӈги’ Тэта Ню, Нядоӈги Вэсако ӈэвтолъяха’. Няхар’’ Ябтоӈэми’ не’ мире’’ ёльцянд’ си’’ми ёльце’’. Няхар’’ тавнандо’ няхар’’ юр’’ тэвна си’’ми’ ми’’ӈа’’. Няхар’’ юр’’ тэмдо’ яркыдо’. Небями’ пухуця няхар’’ тарка мюдм’ хура. Няхар’’ не’ ханми’’.

Пирива’’мата Нядоӈги’ Тэта Тэта ю, Нядоӈги ирими’, Нядоӈги’ пухуця си’’ми хосая тикандо’ то’. Няхар’’ Ябтоӈэми’ мэта’’ ханодо’ савари’’ хабтаха’’на пуйдэйдо’. Ӈарка’ Ябтоӈэми’ самляӈг сэрм’ мюдни’ ирт’ ӈобт’ та’ сярыда. Ёнэй Ябтоӈэ мэта тэдни’ тет хорсе’’эм’ пыда сяра. Няхаромдэй мюдни’ си’’ ялри’ хорха’’. Ӈопойни’ ялриндо’ падвы’’. Нядоӈги’ пухуця си’’ми валӈа. Тайна хунанда мякандо’ тэвына’’, пелей’ нямна мюдми’ сюртеда. Пелейн’ ва’’авми’ лехэбта’’нидав’. Нядоӈги’ пухуця мят’ си’’ми тюле. Нядоӈги Вэсако нюхунда масьнё’: – ТЯханяюмна теда’ ханд’’нинав’, теда’ тяханяӈы ва’’вар ти.

Нядоӈги’ Тэта Ню ва’’ав’ ни’ ӈамды’’. Хуркари’’ хараси’’ няӈэдя похов’, танзавэй’ по’ таня илева’’. Торикаковна ӈэрёй сырада, пилибт’ ха’’мы’’. Сыранда ха’’ма Нядоӈги ирими’ пыда тарем’ маси’’: – Нюв, ӈоб’’ нюв, хуняӈы яля’ ямдабана’’ сава. Яхана’’ хэб’’на’’ сава ӈэдакы. Нюда маси’’: – Тикахав хэхэва’’. Пэвсюмя’ няна едва’’ ӈамава’’. Ханяна’’ хона’’. Хуняна нумда ялэма. Нумда Ялэмзь ямданолына’’. Нядоӈги’ Тэта Ню няхар’’ тарка мюдми’ пуйда’’ нидав’. Нядоӈги ирими’ манзабта’’ нидав’. Няхар’’ тарка мюдми’ вада, наӈэдя ёнарми’ хэӈгадтэян. Таныр’’нидам’. Нядоӈги’ Тэта Ню мюдта’’ ядувна хэвнямна, ханямна танямна ӈэдалёрцеты.Ӈамгэда ӈэвна, наӈэдя иры’ маня’’ мюсева’’. Ӈэсоваханана’’ ӈэсорисетыва’’, ямдаваханана’’ ямдарисетына’’. Наӈэдя иры’ӈэсонзь, Нядоӈги ирими’ ӈани’ ӈэсолкулвы’’. Пыда маси’’: – Тедамбой’ ӈэсойбтехэрцява’’, тына’’ выдара’’. Едва’’ ӈамли, маня’’ хонэйна’’.Хуняна тиканда юркына’’, Нядоӈги’ Тэта Ню пыда тарем’ маси’’:- Тюку яля’ миндани’ ед ӈэдалёртадм’. Нядоӈги’ Тэта Ню ӈамгэ’ мян ты’’, ты’’ ярка. Тиканда ӈэдалэй’’. Яля’ ямбхана сыӈгарёда яӈгу. Нядаӈги’Тэта Ню минданда ед’ тарем сырпата, юд’ мян’ мяд’’, ӈока тэдо’яӈгу. Ихинанда маси’’: – Ю’’ Мандокоми’ ӈэӈгоданакы’’, ӈока тэдо’ вуни таня’, ӈопой юрпёй тэдо’ ялкадарӈа.

Синяӈы хасев’’ хэвувна нултада. Ю’’ Мандоко пихиня мэвы’’. Ервотамдо’ нямдо’ ӈамдалмы’’. Ӈарка Мандоко пыда тарем’ ма: – Ненэць товыню’. Вэва им’ мэта ӈэвы ӈэбта, хавэва’’. Хибян ӈэбат? Нядоӈги’ Тэта Нюм’ тэри нюбе’’ӈав. –Тарця танявонда. – Яра’’ ханедата я ӈэбтав’? Ӈарка Мандоко маси’’: – Ӈока нихива ӈа’’, юд’мян хорахаби хадасетыва’’.- Няро ӈамзакон’ харбилыв’. Мань мякнани’ тэхэв ёнар’’. Ӈарка Мандокор пыда тарем’ маси’’: – Нумла’’ ӈод’’ нарэйман’ харбилы’’. Ӈопой покоця’ нянана’’ ӈэбта’’ вэва? Нядоӈги’ Тэта Ню пыда тарем’ маси’’: – Вэва вуни ӈа’’, нянда’’ ӈэсодава’’.