Округханана ты’ яля’’ ханярина ваераць. Хусувэй выӈгана мюсерта’’ ненэциена ӈарка ялямдо’ мэ’’манзь таславы яхато’ ма’’люрӈаць. Мат яӈганя вертолёт’ хоян’ тэворӈаць. Хой илӈгана тарана ӈавори’’ тавыць, хардахана мэвы ненэця’’ манзарась яхато’ тоць. Хойхана илена’’, мюсерта’’ хибярина тарця ялямдо’ по’ ямбан ӈатесетыдо’. Похонда ӈопой ныланава яляхандо’ хамякосьты’’.

Ӈарка яляхандо’ хамякосьты’’. Ӈобкана ма’’лась, нидо’ манэць, маймбасьты’’. Лаханакурмидо’ минрена’’ серуто’ нямна тянё’’ нисьты’’ ӈа’’. Ты’ яляхана хойхана мюсерта’’ нина’’ поӈгнандо’ пирдырцеты’’, тэхэ’’на’’ ӈэдалёрцеты’’.

Пуданаӈэ’ ты’ ялям мэ’’манзь марад’ тер’’ хибяри’’ ма’’ласьтыд’. Тюку по’ тарця ялява туристический базахана ваерась. Невхы похо’’на выӈгана мюсермы’’ ӈарка хибяри’’, хуний теда маркана иле’’, тикахад’ «Харп», «Ерв», «Няръяна ты» колхозхана тэхэ’’на’’ манзаравы’’ хибяри’’, ветеран’’ таняна ма’’люрӈаць. Няръяна маркад’, Красной, Хонгурей ӈэсыхыд’ товы’’ хибяри’’ таняць.

Хусувэй по’ ты’ ялям’ этно-культурный центрхана манзарана’’ нина’’ хамадабсетыдо’. Пыдо’ хойхана манзаравы’’ ненэцие’’ ядабтабидось, манэ’’лабтадось ханяна ныланавадо’ ваераӈгу. Тыбэрма манзая’ ветеран’’ ӈока ихид’ миндя вади’’ намдаць. Сава вади’’ хэтвась ерв’’ турӈаць. Тикахад’ невхэна тэхэна’’ манзаравы, хойхана харта мюсермы Валентин Румянцев вадам’ мэ’’ӈась. Пыда няданда ӈока ӈамгэм’ намдаваць: ханзер’’ тыбэрма сер’ тю’’у миӈась, ханзер’’ невхэна ненэця’’ ханярина ныхыдо’ нись’ сяй манзараць. Ӈэрм’ тенз’ ненэцие’’ серу тасламбада комитетхана манзарана’’ нина’’ хусувэй хойхана манзаравы’’ ветеранан’ мядонзэйм’ хамандавыць, ӈобкарт товы’’ хибяри’’ ӈуда’ терси нись’ хаю’’.

Культура серу’ пэртя’’ нина’’ ӈод саць сомбой программам’ хамандаць. Сё’’ мэта’’, тарана’’ хибяри’’ нито’ сею’’ маймбтець. «Илебц» театрава концерт’ нэмбиць, тикахад’ Краснойхад’ товы’’ «Нянэй не’’» хыно’’ӈаць, «Ханибцёва» едэй манзаямдо’ манэ’’лабтаць, Егор Лаптандер, Василий Дедков, Татьяна Сядейская сё’’ мэ’’ӈаць.

Тюкумэвахана ваеравы ныланава яляхана хусувэй ӈамгэда савась. Яндахат’ товы’’ хибярина иба нум’ яляхана сававна ныланаць. Паской панытана’’ нина’’ маниесь, ненэця’’ вадам’ намдурць, хари’’ вадавна лаханась ихиня’ савархась. Ӈокаюв’ мядоманзь’ товы’’ хибяри’’ хоян’ теда маля ни’’ тэвор’’, хардахана иле’’. Хэбидя яляхана тарця хибяри’’ ӈод таняць, хуний тенад’ хойхана мюсерӈа’’, тарана серкана тамна манзара’’. Тарця хибяри’’ поӈгана Александр Васильевич, Татьяна Александровна Вылкаха’ танеӈаханзь’. Пыди’ ӈока по’’ ямбан «Ервхана» манзараӈаха’. Александр Васильевич мась: – Мань’ маля ёнар’’ хасуюёнар’’ си’’ив ю’’ самлязимдей поход’ тэна’’ мэм’, теда семьясавэй мюсерӈава’’. Хасава няв’ бригадирма’, мань’ тыбэрӈадм’. Тет нюми’, сидядо’ ӈоб тэхэна мэӈаха’. Ты’ яля сямянд’ ӈатена’’ ялява, сямянд’ ӈарка яля’. Хой’ ил’ сямянд’ сава ил’, теда Краснойхана хардава сулурць, ӈани’ хоян’ танаӈгуна’’. Маня’’ – тыбэртява’’, тына’’ сяхарт’ нина’’ хаеӈгу’’.

Ненсянда ӈод’ тарця, ты’ хойхана соявы, вадювы, манзаравы хибярихина сямянд’ тарана. Тэси’ хуркава ӈэӈгува? Нянэй ненэця’ илевада нянэювна тэхэт’ нив’ пере’’.

Тамна ӈопой по’ ты’ ялуна пуняна хаи’’. Нерняна хойхана мюсерта’’ нина’’ сывы манзаидо’ ӈатена’’, нянэй ненэця’’ варёмдо’ мэць тыдо’ пэрта’’.